Mar 11 | TPA | STEP | Yesu a tauvotagho maitehi muriya po hita ghe'eta au Jerusalem, yana hi ai ghe'eta au Betage ma Bethany, Oya Olive augheregherena. Anima a tauvotagho ruwagha

Mark 11

Yesu i Rui au Jerusalem

(Matthew 21:1-11; Luke 19:28-40; John 12:12-19)

1 Yesu a tauvotagho maitehi muriya po hita ghe'eta au Jerusalem, yana hi ai ghe'eta au Betage ma Bethany, Oya Olive augheregherena. Anima a tauvotagho ruwagha 2 i riwehi, ma i pari'aharehi ipa, “Ona nae meyagai aunaomi ona gheghe'etaiyana, apo donki yaubona hi raghihi po e ma'ama'ae, egha aiya ghehauna ita geru dadani, ona ohei po ona neiya'i wehidana. ^{▼▼11:2Mai Judea ahi nota yana rava yamoyamona ahi bagibagi donki e dewadewai. Donkina geruna yana ei atataiyeta da Yesu i nene'i a nuwahubana me nuwahopuhopu guyau.} 3 Ma aiya'i ina raubayademi inapa, ‘Aiwa aubaina we o dewadewai?’ yana ona riwei, ‘Onapa Bada i rauhogharei ma apo mara tupona'ava, ma ina himirameeiya'i.’”

4 Aubaina ahi ruwagha hi nae po donkina yaubona au tayaha rava hi raghihi numa au mata'etana po i mahimahiri hi nehaghai, yana hi ohe'ohei, 5 ma nahidana rava hi mahimahiri yana hi raubayadehi hipa, “Aiwa aubaina donkina yaubona o ohe'ohei?”

6 Po a tauvotagho ruwagha hi paribeehi, Yesu me i ririwanehi nana'arena, anima ravahi hi vi'aninehi po hi naiyei. 7 Maranai donkina hi neiya auwarina, yana ahi anirauhawawara au uputuwana hi ta'uri ma autepana Yesu i tughura. ^{▼▼11:72 Kings 9:12-13}

8 Ma rava maghamaghauhi ahi anirauhawawara au tayaha hi ta'uri ma ghehauhi ghihi au 'wapu hi tarai ma au tayaha hi ta'uri. ^{▼▼11:8John 12:13, auwarina yana rava ghihi ruguruguhi au tayaha hi ta'uri ma Yesu hi vi'ate'atei ma hi vokaokaohei me guyau.} 9 Ma rava aiyavo hi tayatayaha po waimurihi hi otu'otu ma hipa, “Maimaituwa ta votaraghaiyei! Maimaituwa ina vi'ahi'ahini, tauna Bada wavanei e nene'i!

Votaraghae! ^{▼▼11:9‘Hosana’ Aramaic ponahiyei aunaona yana ‘ma viyawahani'ai’ ma marina yana ‘votaraghae’ ma ‘vokaokaoha’ . Ma egana 9–10 auwarina rava Psalm 118 hei babaniyei, yana votaraghae ana psalm. Marina tauhi yana Yesu he vokaokaohei guyau nana'arena.}
Wai'ahi'ahinana tauna auwarina Bada wavanei e nene'i. 10 Wai'ahi'ahinana amata David a umavou e nene'i ma a vitaniwaga vouna ta kaohei!
Votaraghae Maimaituwa auwarina!”
11 Anima Yesu i ghe'eta au Jerusalem po i rui Maimaituwa a au Numa. Ma ginauri atapuhi i inana naiyehi, ma aita au i biga aubaina po a tauvotagho 12 maitehi hi nae au Bethany.

Yesu Kaiyaha i Parikubai

(Matthew 21:18-19)

12 Maratom au ghehauna, maranai Yesu a tauvotagho maitehi Bethaniyei hi nenememe'i, yana am i voiyei. 13 Ma kaiyaha rauruguna auheiya i inanai, aubaina i nae po anona ita baihei, ma maranai i nae auwarina yana egha anona ma ruguna'ava, babana egha ana hauga rau'ano. 14 Anima Yesu kaiyahana i riwei ipa, “Egha meyanai aiya anom ina ameei!” ^{▼▼11:14Maranai kaiyaha e raurugu yana e rau'ano. Ma we au marana yana egha rau'ano ana mara, ma i raurugu yana ita rau'ano ma e'egha. Kaiyaha yana mara atapuna Israel he ampariruvaruvai (Micah 7:1-6). We ampariruvaruvana yana eyagi ruguruguna ma egha anona yana mai Israel egha anohi. Moses a raugagayo hei hanahanapuwei ma rava au matahi he rautaghoi ma auhinenihi yana egha anohi.} Anima a tauvotagho aiwa i yatoyatoniya hi nonori.

Yesu, Tauvi'une'une Maimaituwa a Numei i Vireta Hopunehi

(Matthew 21:12-17; Luke 19:45-48; John 2:13-22)

15 Maranai Yesu a tauvotagho maitehi hi raughe'eta au Jerusalem, yana Yesu i rui Maimaituwa ana Numa* au ganahobena ma tauvi'une'une i vireta hopunehi ma mane tauvivereverena ^{▼▼11:15Dobu gheha manehi mai Judea ahi mane maitenahi hi vereverenei.} ahi pata ma gabubu taugimareina ahi anitughura i buinihi. 16 Ma i vigha'a po egha anivigimagimara hina'avara ma hina vitupatuni Maimaituwa ana Numa ganahobenei. 17 Maranai i hanahanapuhi yana ipa, “Maimaituwa ponana hi girugirumiya ipa, ‘Rava hina riwa da a'u numa yana dobu atapuna ravahi ahi pari numana.’ ^{▼▼11:17Isaiah 56:7}

Ma taumi o dewai po me rava danedanenehi, ahi numa.” ^{▼▼11:17Jeremiah 7:11-15}
18 Gudutaupuyoweina* ghaeghaehi ma raugagayo tauvihanahanapuweina we hi nonori yana hi vikare po tayaha hi baibaiha vihiraghenana aubaina ma hi rovowei, babana rava boruhi a vihanahanapu auwarina hi amhuna.

19 Maranai au i pompom yana a tauvotagho maitehi Jerusalem hi ne'aharei.

Kaiyahana i Po'i

(Matthew 21:20-22)

20 Maratomtom ghehauna Yesu a tauvotagho maitehi hi ne'i po hita verauvira ma kaiyahana hi inanai yana i po'i. 21 Ma Peter nuwanei i ghae po Yesu i riwei ipa, “Tauvihanahanapu ma inanai! Kaiyahana u parikubaiya i po'i.”

22 Yesu i paribeehi ipa, “Maimaituwa ona vitumaghanei. 23 Ta'u yana riwa vaimaiha a ririwemi, rava aiya we oyana ina riwei inapa, ‘Ma nae po ma aharemem au boga’ ma egha ina raunuwa ruwaruwagha, ma ina vitumaghana* yana aiwa i ririweiya, apo ina wawara ma aubaina apo ina dewai. 24 Yamna aubaina po a ririwemi. Maranai ginauri aiwa o raupari ma oi bagheiya, ona vitumaghana da boiboghi o vaini, yana apo aiwa oi bagheiya ina veremi. 25 Maranai e raupari ma rava ghehauna i dewabo'a auwarim, yana ma ai nuwa'aharei, ma Amam au mara nana'arena apo am dewabo'a ina nuwa'aharei.”

Mai Judea* ahi Babada Yesu a Vaivai hi Vitaravirevirei

(Matthew 21:23-27; Luke 20:1-8)

27 Yesu, a tauvotagho maitehi hi ghe'etame au Jerusalem, ma Yesu i naenae Maimaituwa ana Numa* au ganahobe, ma gudutaupuyoweina* ghaeghaehi, raugagayo tauvihanahanapuweina ma ahi babada hi ne'i auwarina, 28 po a vaivai hi vitaravirevirei hipa, “Aiya wavanei we dewahi e dewadewai? Bo aiya vaivaina i verem?”

29 Ma Yesu i pariverehi ipa, “A'u raubayada emosi a vitaravireviremi, po ona vimaihei ma apo a riwemi, aiwa vaivainei we ginaurihi a dewadewahi. 30 Ona riwe'u John aiya i riwei po i ambabataito: Maimaituwa bo rava?”

31 Tauhi'ava hi vikare po hi taratarapiri vivira hipa, “Me ta riwanei, inapa ta paribeei tanapa Maimaituwa, yana apo inapa, ‘aiwa aubaina John egha ota vitumaghanei?’ 32 Wate apo egha tana riwa da rava hi riwei.” Babana rava yana John hi vitumaghanei, da tauna peroveta, po patarahi hi rovowehi. ^{▼▼11:32Luke 20:6} 33 Po ahi paribeeyana Yesu auwarina yana hipa, “Egha ata hanapuwei.”

Ma Yesu i riwehi ipa, “Ta'u nana'arena apegha a riwemi, da aiwa vaivainei we ginaurihi a dewadewahi.”